صوره مسروقه
____________
صوره بتوصف
وجع فيها بجد
كادر باهت
لبيت. مهجور
وأجمل ليالي
بتتحكي
ذكريات
في سطور
الصوره مسروقه
من سنين العمر
وتراب الزمن مغطيها
سفينه الأيام
وسط الرياح
والسطو. والسفاح
تاهت مراسيها
لا الطير بطل يغرد
ولا الكلب بطل نباح
آن الآوان للغروب
يرحل
ويتولد م العتمه الف صباح
آن الآوان ان الحمول ترتاح
والولد
مستني بكره
هييجي الفجر
بكره ورا. بكره
ورا بكره
قابض علي حلمه
كيف الجمر
واتسرقت الفكره
وسط الميدان
لبن وريحته الخمر
توهان
في دنيا كلها حرمان
آن الآوان
نحاسب الجلاد
ونحاكم الكرباج
ونقتل الكف
والرحايه اللي
دهست عضمنا
تبطل لف
آن الآوان يفوق سكرانك
وعليلك يخف
يا ضهر ياحمال
يا ضهر يا منجلد
لابد
توضع لصبرك حد
أنت اللي صانع عبورك
وأنت اللي باني السد
يا أيدين يا متكتفه
وفي سجنها
تزرع عيدان الورد
مين علم الولد
أصول الهم والحزن و الجد
مين علم الولد
الصبر والاحتمال
مستني من 100 سنه
يجني غيطان التعب
يا دنيا وليها العجب
كبر الولد عوده أنحني
والحيل أكيد أتهد
بقلمي /
شداد أبوعمر
ليست هناك تعليقات:
إرسال تعليق