حشاش الحشاشين
***************
قاعد سهران علي القهوة
مستني الشلة الفاسدة
و عاملك دوشة وربكة
وجيوبك فاضية ياحسرة
وحياتك ملهاش لازمة
ماتشوفلك لعبة تانية
ياحشاش الحشاشين
****************
ودخلت الجامع قلنا
ربنا هداك تنفعنا
وأتاري هدايتك لحظة
تختارها وقت اللازمة
مجنون زي المجانين
روح ألعب لعبة غيرها
ياحشاش الحشاشين
****************
ويجي رمضان تتحضر
وتلبس جلابية وعمة
وتعمل فيها شيخ أزهر
يضلالي فين الذمة
وحياتك كلها بتهزر
ماتشوفلك لعبة تانية
ياحشاش الحشاشين
*****************
مراتك تلطم وتصوت
وانت ولا شاغل بالك
وعيالك منك قرفت
وعامل مسطول وتحور
وتألف حكايات كدابة
يا. أخي روح ضربة تغمك
يا حشاش الحشاشين
*****************
ويجي العيد وكأنك
جاي من كوكب تاني
عبيط ولا بتستعبط
وعاملي نفسك ناسي
ومطنش النقدية
وقاعد في الارض مبلط
ياحشاش الحشاشين
*****************
الناس المزاجاتنية
صاحبة الكيف والقهوة
مش حاسة بالمسئولية
وزي العربية الراكنة
ودخلنا في القضية
ورجعنا لنفس النقطة
ياحشاش الحشاشين
******************
صدرك أتهري وأتخرم
لانافع رق ولاطبلة
وجبت لأهلك ورم
من السيجارة والمزة
بقي ده شباب هيحارب
ويمسك البندقية
ياحشاش الحشاشين
******************
ياألف خسارة عليك
يا أمل وبكره وبعده
ضيعت إللي في إيديك
ياوكسة و علينا ناكسة
عالة و خسارة فيك
أكلك وشرب المية
ياحشاش الحشاشين
*************
بسيوني صديق
ليست هناك تعليقات:
إرسال تعليق