(جنونك هو عنواني )
بقلمي / عصام حسيني مدين
.............................................
بتتشاقى وكأنك طفلة مجنونة
كأنك رسمه فوق الشمس تتحنى
كأنك ضحكة وبتعلى فى ايقونة
كنسمه بتهدى افراحها كما الجنة
كطله شمس بتصبح على النايمين
تدفى قلوبهم الباردة
يقوموا الصبح
و يغنوا غناوى الحب والعاشقين
واشواقهم مفيش فايدة
لا هى بتهدى و لا بترحم نيران قايدة
جنانك ليه بيعجبنى و باضحك ليه ؟
وانا عمرى قضيته كله ع الهامش
حزين حيران وعايش بس مش عايش
جنونك طعمه متلون بأجمل لون
مع انى كنت بتحاشى اكون مجنون
وعايش جد طول عمرى بليد مسجون
واحلامى على ادى رافضها الكون
وضحكاتى بتتخبى كأنى عيب اوريها
واظهر حسنها للناس فاخليها
تكون ليا تكون فيا وتتدارى فى اغنية
فى بيت من شعر ألفته على الميه
على بنت زمان كانت جارتى وحبيتها
رسمت الحلم فى عنيها وفى عنيا
لكن طارت وعشت بجد بعديها
فى كام قصة بلون الدمع مروية
جنانك جانى غيرنى وحيرنى
وخايف لما اعوز نومى يسهرنى
ويفرد نسمه من طيفه ويحظرنى
كما فى الفيس وبتعذب ويتدلل
اعوز اكتب فيمنعنى وينهرنى
اعوز ابعت صداقة لحد فيقهرنى
انا خايف جنانك يبقى قدامى
ومش طايله جنانك ليه بيأسرنى
بقيت مجنون وليكى الفضل فى جنانى
بقيت بضحك بصوت عالى
وناسى كل احزانى
جنانك عدوى وعدانى
جنانك لم ايامى وخش بقوة وجدانى
فسامحينى بقيت مجنون
بقيت عايش هعيش تانى
واعوض اللى ضاع منى فى حرمانى
وأشجاني وأحزاني
انا المجنون يا مجنونة جنونك هو عنواني
جنونك هو عنواني
..............................
عصام حسيني مدين
ليست هناك تعليقات:
إرسال تعليق