مجلة سماء الأبداع للشعر والأدب الألكترونية كتبت الشاعرة إقبال النشار قصيدة بعنوان بشوفها أيوه بشوف

بشوفها ...ايوه بشوف
نفسى فى مرايتى
---------

بشوفها تملى ف الصورة ...

بتضحك بس مكسورة ...

فى ضحكتها دموع بتبان ...

وتايهه فى بحر م الاشجان ...

بحس بنبضها القلقان ...

ودمعة قلبها الندمان ...

طيبتها بتملى اى مكان ...

بروح بتحلى اى زمان...

وجودها بيظهر الألوان ...

وصوتها بحسه انه كمان ...

وصادقة فى اى وضع كان ...

كلامها لغيرها م الوجدان ...

بشوف برائتها فى النسيان ...

بحب غريب وبحر إيمان ...

بتحضن نصها المليان ...

ومش بتبص للحرمان ...

تدارى تملى مشاعرها ...

عشان تسعد قلوب غيرها ...

وده بيبان ف تأثيرها  ...

ودعويها فى كل أذان ...

وقالوا سكوتها ده معناه ...

فرح ف القلب مش معاناه ...

لكن ف كتير جراح جواه ...

واحلامها تعيش ف أمان ...

بتسرح فى النجوم بمعاد ...

وواخده من اللى فات الزاد ...

بتصبر لو همومها شداد ...

وافعالها اكيد فى ميزان ...

بشوفها تملى. ........
          إقبال النشار
...