هو ...............هي
ادي حالنا وحال البيت
فطارنا نكد وعشانا صويت
وانا من حالي ياناس مليت
عاوز اخبط راسي بالحيط
هي ...............
ليل ونهار اعمال البيت
اطبخ واغسل واتهدِيت
لا شوفت راحه ولا اتهنيت
عاوزه اخبط راسي بالحيط
هو ..................
انا اتخدعت واتغشيت
قالو دلوعه واتمنيت
طلعت ظابط واتربيت
عاوز اخبط راسي بالحيط
هي ................
لا شوفت فسحه ولا اتمشيت
ليلي نهاري في سجن البيت
والحنيه ياناس مالقيت
عاوزه اخبط راسي بالحيط
هو..................
عطر النكد بقى عطر البيت
اطلب مسلوق تعمله اوملت
ومن الشغل ياريتني ماجيت
عاوز اخبط راسي بالحيط
هي ...............
شيفاك كده ع الغدر نويت
دايما تسهر خارج البيت
عاشق ولا تكون حبيت
عاوزه اخبط راسي بالحيط
هو .................
نفسي ع الكنبه اقيل
واكون رومانسي واتخيل
عسل النحل في شفايفك
والورد.من خَدك مَيل
هي ...............
حالك مهبب ومنيل
لا مقدر زوجه ولا عيل
جاي بسلامتك فاضي
وانا في المطبخ بتخيل
هو ................
خليكي في المطبخ احسن
بلاش رومانسي كده احسن
الناس تعيش في امان وسلام
و انتي بتحبي الأكشن
هي ..................
تلاجة البيت عطلانه
وانبوبة الغاز خلصانه
شوفلك حل مع الإتنين
المكوه محتاجه صيانه
هو ..........
الحل محتاج لحصانه
وقانون يقولك غلطانه
وقفتي كل احوال البيت
عشان سيادتك كسلانه
هي .........
إِبعد. كِدى ووسَع عَدي
بيعرضو مسلسل تركي
وبعده فيلم عن الإرهاب
وبعده في مسلسل هندي
هو .........
أدي حال الأمهات
الوقت ضايع ع الشاشات
شويه راح ينسو العربي
ويكلمونا بكل لغات
هي ....
ع الكوره قاعد تتفرج
صوتك طالع وتهرج
تدرس لعب كل لَعيب
إمتى ناوي تتخرج
هو ............
خليكي حلوه وتفائلي
وإدعي بالفوز للأهلي
لو الزمالك جاب الجول
يبقى النكد رح تستاهلي
هي .......
لا عاوزه لعب ولا لاعيبه
هات المسلسل بلا خيبه
اخر حلقه فيه اليوم
وشوف نهاية اِلحَبيبه
هو ..........
بلا مسلسل بلا نيله
انتظري اشوف اللاعيبه
مين في خط هجوم اليوم
ومين نجوم التشكيله
هي .........
انا اللي هبقى دفاع وهجوم
وابقى الظالم والمظلوم
اخر يوم اليوم لسعادتك
ومن الشاشه كمان محروم
هو ...........
كسرتي الشاشه يا مجنونه
بالهندي عاشقه ومفتونه
فين طبيخك فين اللحم
المعده نشفت م التونه
هي ......
عجبك كدى الناس سمعونا
حتى جيرانا كرهونا
الف مره يعاتبونا
المره دي هيشكونا
هههههههههههههههههههههههه
علاء رجب
ليست هناك تعليقات:
إرسال تعليق