عن عيد العمال أتحدث
كل عام وعمال بلدنا المظاليم في خير
فى ناس شقيانه تتحايل ع الأيام
وناس غرقانه ف الفته وف الأحلام
وناس عنها العلاج ممنوع
وناس واكل بطونها الجوع
وناس عايشه ومش عايشه مرار والآم
مفيش عمال ولا عماله ولا مصنع
مفيش ولامكنه شغاله ولا انتاج بقى بيطلع
ولا جوده ولا علاوه وكله ياسيدي متقطع
خلاص الخصخصه خصت خلاصه القول كله كلام
أكاد أجزم بأن الحرب دي باقيه وعلينا الدور
عشان الساده كرهيني أعيش مستور
وحتى صاحب المصنع
ده كان راجل ف يوم مجدع
واهو دلوقت باخساره بقى طرطور
بقى منافق ومتعزرط وبيخصم من الراتب كتير أيام
خلاص خربت وجفت كل سواقيها
بلد بايظه وفيها الفقر ماليها
وفيها ناس بقت عايشه على الاقساط
وكله ف الهموم بيبات
وسعر السلعه كاويها
وقبل ما تمضي ياسيدنا هندفع كام
عيد العمال بقى ذكرى
بقى فكره يجوز ترجع ف يوم بكره
ياريت تيجي على بلادنا سحابه خير
ويجي الطير ومتونس ومستأنس سُحب وغمام
#أبوحفيظه
ليست هناك تعليقات:
إرسال تعليق