قصيدة
( تقاعد )
؛؛؛÷؛؛؛؛؛؛؛؛؛؛؛؛؛؛؛
لما صحيت ع الموت
م الموت
وانضميت علي ذات البيت
اللي ماحطوش
ف الرسم ابوابه
ولافاتاحوش شبابيك
الا يادوبك ع الطرطوفه
كتبوا الاسم
ونوع الموته لكل شريك
وسنين راحت
وسنين فاحت
وسنين تسأل
وبتستأذن لجل تفوت
مين راح يعرف
امتي وفين
انقطع القوت
واتأكدت تمام مظبوط
ان الحاله
حالة موت
احنا تلاته دخلنا البيت
اتعرفنا
من غير كلمه
من غير نظره
من غير صوت
راح الاول
من غير حتي ايديه ماتحرك
قوس ف كمنجه
يعزف لحن الموت ببكاه
واللي قصاده
بعود راح يعزف
علي اوتار مرخيه
بتنزف
ولا فيه نوته
ولا مرسوم علي وشه خريطه تبين
ايه خللاه يختار العزله
ويرمي وراه دنياه
كان بيخبي وهو بيعزف
او بيدندن
شيئ جواه
واحنا معاه بندندن
زيه ونبكي
ماهو جوانا موصل
دغري علي جواه
وانا ف الشعر .
بحس باقوله
كنت اتباهي
وفيه الهيبه وفيه الجاه
قالوا الشاعر فيك اتجنن
ياولداه
مات الشعر ومات اللحن.
وضاع الحس
وراح معناه
كنا بنصرخ لمانغني
لما ندندن
لم بنفتش بطن الشاعر
بس صراخنا
انسلت فيه البحه اللي
بتدبحنا
ولايطلعش الصوت ف صراخنا
ولا ف البيت اللي ماحطوش ف الرسم ابوابه
ولافتحوش شبابيك
ولا حواليه
انزرعت رحمه
ولاضليله
ولاعصفوره تلم القش
وتبني العش
ف شجرة توت
واتأكدت ساعتها
ان الكل
في عز الحاله
حالة موت
؛؛؛؛؛؛؛؛؛؛؛؛؛؛؛؛؛؛؛
الشاعر/مغاوري كروش
ليست هناك تعليقات:
إرسال تعليق