قصيده بالعاميه المصريه
( شعر الحداثه)
============
الحصن الأخير
============
من تحت الخط اللي بيفصل
بين نصين الشمس
والسورالمتقابل
عنده ومتفرق
لون الضلين
شمسك بردانه؟؟
مش شايف؟!
ضلك متكرمش
راكن ع السور
ومعاك عكازك
بتحاول تتخفي ف ضلك
عاوز تتشعلق
فوف الاطلال
الوكلاها فيران الشيخوخه
بتحاول تعبر
بعنيك التيهانه
من فوق السور الدفيان
لكن
مش قادرتصلب
عالماضي المتحنط
توبك
وتصفي العرق المحبوس
البايت جواك
ينضح علي نني عنيك
أحزان
ضلك متكرمش
ودماغك لما بتتقل
تحضنها
قرافيص رجليك
طب ايه اللي فنفسك
يالقاعد حيران
عاوز تلبس سروالك
عالوش التاني الحران
وتشد حصانك
وتعافر
عالخط المتوصل
بينك وعيون الشمس
وترج السور اللي بيقسم
ويغير حال الضلين
لو كانت ايدك طلقانه
حاتلف الشمس وتقلبها
عالوش اللي يحرك
فيك الغليان
لو تعرف
ان الشمس المليانه
بالطيف واللون
بتلف تمللي في مواعيدها
مايهمش مين اللي مخالف
ولامين العاقل ف الكون
فيا صاحبي المتألم
سلم
يكفيك العكاز اللي فإيدك
حايعيدك
لبياض الضحك المتهرب
جواك
وان قابلك في الدنيا
مثيلك
مش قادر يصلب
ع الماضي المتحنط
توبه
ومعاه العكاز
قدم له نصيحتي بحذافيرها
واشرح وياه الالغاز
=============
الشاعر/ مغاوري كروش
ليست هناك تعليقات:
إرسال تعليق