قصيدة بعنوان(صدقيني)
صدقيني لما أقولك
قلبي مش مرتاح ف حضنك
واني مدفون جوه منك غصب عني
واني بعشق كل تفاصيلك وحسنك غصب عني
وبنجرح
من حضنك البردان وإحساسي بقساوتك
تنكسر ف عنيا صورتك
أجمع الألم اللي نابت بين ضلوعك ... جوه مني
وأحضنك
وأتوضا بالحلم اللي بينور ف صبحك
وأبتسم ...وأنا بنجرح من جوه روحي
أبتسم
وأتنفس النور اللي ساكن ف ابتسامتك
إيه فاضلك غير سنين العشق بيا تفكرك
ايه فاضلك غير دموعي
وكنت فوق وش الزمن بحضن ترابك
رغم موتي ورغم جرحك
دمي كان سرسوب ربيع يلضم بروحك خطوتي
تجري ف عروقي محبتك
ومحبتي....
وانا كنت نيلك لوعطشتي أصب ف وريدك أمل
وحنيني نبضك يوهبك طعم الحياه
وأتنفسك جوايا روح مدت جسور العشق مرسي للنجاه
توصل لبرك
صدقيني لما أقولك
بنكسر
والشوق ف دمي بينتحر
وأنا قلبي شايفك وإنتي لسه بتنحني
وتوطي راسك للي بايعك بالرخيص
وتيتمي الأحلام بخوفك
م اللي شاربين دم قلبك
وتبعيها للخسيس.....
صدقيني
ببقي شايف طلتك شوق بيناديني
بس لما بروح لحضنك
شئ ف حضنك بيجافيني
وأبقي بسأل روحي دايما
ليه جوارحي بتعشقك
وانتي ف غلاوتك تخدعيني
لا عدت أصدق ضحكتك
ولا هبتسم
ف عنيكي وانتي بتدبحيني
صدقيني
محمد محمد الطنطاوي
ليست هناك تعليقات:
إرسال تعليق