((العرف الضال))
صنم نفسى مش أحطمه لا أنسفه نسف كده أمحيه كده من على وش الدنيا ليه لأن العرف الضال ده بيخالف الشريعة الإسلامية تماما إزاى مثلا عندنا فى مصر يبقى واحد ميت اللهم أرحم المسلمين أحياء كانوا او أموات اللهم أمين بقول يبقى واحد ميت بعد ما يموت بعد النياحة واللطم المعتاد من بعض النساء تلاقى بقه أول يوم خميس بعد وفاة اخونا ده يقولك ( الخميس بتاع المرحوم - الأربعين بتاع المرحوم - سنوية المرحوم ) وجزم بإنه مرحوم مش الله يرحمه أو رحمه الله لا المرحوم كده على طول دى حاجة تلاقى بقه وانا ربنا من عليه ودفنت كتير قبل كده فى الترب تلاقى بعض الرجال والنساء رايحين يزوروا متوفى ليهم يجيبوا معاهم ( فاكهة وقرص ويقولك رحمة ونور ) على روح برده المرحوم وممكن كمان شيخ يقرأ ربعين ولا حاجة عند القبر برده ياعنى انا مش عارف هل المقابر دى زيارتها عشان العظة ولا عشان ناكل ونشرب عندها وايه حفلة بقه تلاقى موز وسفندى ومش عارف ايه وياكلم فى المقابر ويرموا كده فى اى حته وخلاص يا عنى والله ما انا عارف دى جنينة حيوانات ولا مقابر الحقيقة ، حاجة تانية تلاقى جدودنا وجداتنا الله يطول عمرهم ويحسن عملهم يشوف مثلا أعزكم الله شبشب أو جزمة مقلوبة كده على وشها يقوم يقولك بسرعة الحق يا فلان أعدل الشبشب او الجزمة دى حرام يابنى انا لحد النهارده نفسى اعرف جابوا حرام فى الحكاية دى منين مش عارف والله ، لما كنت انا طالب فى الكلية قاعد فى محاضرة فى امان الله لقيت دكتورة تربوى الله يحفظها ويبارك فيها رغم انها واصلة لدرجة علمية عالية إلا إنها كانت مؤمنة بالعرف الضال إزاى كانت بتبارك لبنت طالعة الأولى على قسمنا وقتها مش فاكر كنت فى سنة 2 ولا 3 كلية المهم قالت للبنت دى ( امسكى الخشب ) طبعا أنا ما باسكتش نصحت الدكتورة دى فى مكتبها وإلى الأن احنا على تواصل وبتحترمنى جدا لأنى صادق الحمد لله ، تلاقى مثلا راجل محترم كده ما شاء معلق فى مراية العربية جزمة صغيرة او حجاب او خمسة وخميسة وكده فى اعتقاده مش هيتحسد لا حول ولا قوة إلا بالله ، أخيرا وليس آخرا ظابط شرطة يموت أو ظابط جيش أو عساكر مجندين يموتوا فى مداهمة مع مجرمين أو إرهابيين رحمة الله على رجال الأمن تلاقى بقه المذيعين طالعين فى النشرة بقه يقولولك وقد استشهد اليوم فلان وفلان وفلان من رجال الجيش أو الشرطة طيب يا حبايبى ازاى تجزموا أنهم شهداء دخلتم فى نيتهم وﻻ اطلعتوا ع الغيب يا اخوانا انتم المهم انا اسف إنى طولت على حضراتكم وللحديث بقية إن شاء الله .
شكر الله لكم
تحياتى/#شاعرالمشاكل#
أسامة عياد
ليست هناك تعليقات:
إرسال تعليق