مش باقي في وجودي غيرها حبة امل
ممزوجة بالضحكة ورسمة فيها خيال
مش كل حاجة المال.. هاتتغير الاحوال
وبكرة تتعدل
وحصانك الاعرج هاتبفى بيه خيال
والعيشة تتعدل
وعيش الحياة مجنون
ولو الرجولة هموم ؟
فاخلينا لسه عيال
دور علي الطفل اللي فيك
هاتلاقي فيه مليون وجع كبر وشاخ
وساب نصيبه من الفرح وشكله باخ
كان رامي هموم الدنيا ومطنش
ولبكرة مش شايل
كان شراع في مركبه سارحة
مع نسمة الهوى اتمايل
مين اللي قتله لك ؟
و موت في عنيه البراءة ؟
مين شيله همومك ؟
وزرع جواه الجراءة ؟
علمته ليه نطق الكلام
و القيل وقال
واذاي يسطر بالجدال
خلاص سجنته بحكم مقضي
ملهش نقض ولا ليه براءة
اطلق سراحه من الالم
واخلق له حلمه من العدم
وابنيله صرحه اللي اتهدم
وازرع له كام مليون امل
يطرح له جسر يكون امان
يعدي بيه لايام زماااان
ويعيش حياته وينبسط
ويلم عقده اللي انفرط
ويشوف حنان
#محمود_العوامي
ليست هناك تعليقات:
إرسال تعليق