ليه دايما عمرنا ما بنغنى للى هيكون
و بنغنى للى كان.
و دايما بنغنى لليل
و عمرنا ما بنغنى للنهار.
و بنغنى لقمر من نور
و ما بنغنيش لشمس من نار.
و طول عمرنا
و فى كل وقتنا
بنغنى للحب و بنغنيش للحنان.
أصل إمبارح تقدر تقول إنه.
لكن بكرا
ما تقدرش تقول حاجة عنه.
و إمبارح تقول عملت و سويت
هوا الكلام بيدفعوا تمنه
و تبقا الحكاية سطر
و انت تكتب كتاب
طبعا ما إنت بتاخد من منه تحط فى منه.
و الليل يا صاحب ستار
صحيح فيه ناس بتقضيه تهدج و صلاة.
لكن كتير بيقضوه بعيد عن ربنا
فى إبيار مالهاش قرار.
إنما النهار فضاح
الخير فيه باين و الشر فيه باين
و طول عمر النهار وضاح.
و بنغنى لقمر من نور
عشان القمر بييجى مع الليل
و الليل بيحب السهر.
و يا سيدى يا سيدى
على ليل و قمر
و يا سلام لو تكمل
و يبقا سهران معاك حبيبة قمر.
لكن الشمس نار
و النهار عمل و شقا و مرار .
و البنى آدم فى زماننا بقا مسكين.
عشان اللقمة بيمشى بالمشوار.
و طول عمرنا بنغنى للحب
طب ما طبعا
أممال هنغنى لإيه.
إوعاك تكون ما غنتش للحب
أصلك تبقا ما حبتش
و ما إشتقتش لحبيبك
و غرقت فى بحر عينيه.
إنما الحنان ..
يا سلام على الحنان
الحنان يرجع الإنسان إنسان.
يرجعه صدر حنين لتعبان
يرجعه قلب حنين لحيران
يرجعه عقل حنين لقلقان
تصدق بإيه
لو ربنا ما كانش حنين علينا
كان عمل إيه فينا
طب آديك شايف
إحنا بنعمل إيه فى بعضينا.
إنما لأن ربنا حنين إدانا الحنان.
أنا بأستغرب أوى
من اللى نفسه يبقا ملاك
طب إحنا ..إنت و أنا يعنى.
كل واحد فينا
يا ريته بس يبقا إنسان.
عجوز غاوى شعر
مرقص اقلاديوس
ليست هناك تعليقات:
إرسال تعليق