صحوة الموت
فاكر اخر مرة
ابويا قعد معايا فيها
وقالي يابني خلي بالك
الحياة مرة
ياما ها تعاني فيها
وكانت اخر قاعدة
والغريب فيها
كل مايعدي شخص
يسلم عليه
ويقوله سامحني
كانه مفارق الحياة
يظهر انها صحوة الموت
وانا مش في بالي
ووشه كان فلقة قمر
كانه شاب صغير
ونسي المرض
وافتكر الذكريات
وكل الي فاته
بحلوه واهاته
وانا اسمع حكاياته
وعقلي اتحير
في ايه ياابويا
اتاريها صحوة الموت
بعد شويه في الظهريه
عدي علينا جارنا
وابويا كان مخاصمه
قام ابوبا جري عليه
وخده في حضنه
قال ايه عشان يصالحه
استغرب الراجل
قاله ابويا الدنيا مفارقه
اتاريها صحوة الموت
اه لو نعرف معادالموت
كنا عملنا حسابنا
لكن القريب من ربه
يعرف ايه علامات الموت
تغير الحال
من حال الي حال
ابويا كان بيقيل
شويه كل يوم
بس في اليوم ده راح النوم
اتاري مش هايجي عليه اليوم
زي مايكون قلبه حاسس
سالته في ايه ياابويا
قالي ده سر والسر مكتوم
عرفت ساعتها
انها صحوة الموت
وللمرة التانيه
فاكر اخر مرة
وصاني ابويا بالصلاة وقالي
حافظ عليها ياابني
وبادر بالخير تملي
والحج والعمرة بدري
القبر ضيق ع البخيل اللي مايدي
الحق الفرصه ده العمر بيجري
كان بيتكلم وهو بيضحك
كانه شايف الجنه ونعيمها
عرفت ساعتها
انها صحوة الموت
وفي اخر اليوم
نداني الغالي
وقالي ياحبيبي
ياكرة عيني
انا رايح لحبيبي
اتفزعت وقلت
هو في حبيب غيري
قالي طبعا
اللي خلقك وخلقني
وفي لحظة صمت غريبه
مسك ايدي بقوة
ونطق الشهاده
طبعا كان حافظ القران
وماشي في حب الله
اتاريها سكرات الموت
رحل ابويا
والايام جريت وعدت
بسرعة البرق
وكبرت وبقيت زيه
والشعر الاسود شاب
والظهر انحني ومال
وبقيت منتظر الموت
كلمات بسيوني صديق
ليست هناك تعليقات:
إرسال تعليق