ايام زمان فى بيوت العيله
كانت الحياه سهله وجميله
كان الرضا مسيطر على الكل
مع ان البيوت كانت كلها تقيله
كانت لقمه بتجمع الكل
وتلاقى البركه والخير بيهل
والبيت كان فيه ب30 نفر
مكنش حد بيزهق ولا يمل
مكنتش كترت الأمراض كده
كانت الحياه حلوه وزى الفل
كانت كل حاجه فيها خير
وكان فيه احترام وتقدير
وكان بيتعمل حساب للكبير
كانت كلمته سيف
تمشى على الصغير والكبير
ابدا مكنش فيه وش ولا مشاكل
وكلو من على طبليه واحده ياكل
كانت اللى مربيانى وفى مقام امى
مراة عمى ومراة عمى وامراة عمى
مكنتش تعرف مين ابن مين
كان ابويه زايه وزى عمى وعمى
الحنيه والحب كان مسيطر على البيت
ابن عمى وابن عمى كلو ينام جانبى
ايوى والله.....
كان الشاب على 16 سنه يلموه
على طول فى اى مقعد بيجوزوه
وكانت الناس بترضى وبيناسبوه
أيامها مكنش فيه شقق
ولما يتقدم لاى بنت على طول يدوه
اول مايبيعو القطن يروحو يدخلوه
كان الكل فى بيت العيله واحد
كان ابن عمه بس تحس ان اخوه
كنت تلاقى البيت مليان كوم عيال
والعيل من لبس اولاد عمه يلبسوه
والعيل يحب اولاد اعمامه
واولاد اعمامه التانيين يحبوه
كانت الحياه حلوه
تعالو شوفو النهارده يا خلق ياهوه
تعالى شوف النهارده
محدش بقى بيرضى
الكل بقى متغير
محدش بقى بحاله راضى
وكل اخ عايش فى وادى
اخوات بعضيهم
وفى بعضيهم زى الأعادى
الاخ بيطمع فى اخوه
وحق البنت بياكلوه
والابن الوحدانى
بيتجوز وبيعزل عن ابوه
كل واحد بيقول يلا حالى
والابن ممكن تلاقى
ابوه وامه بيرموه
ومن البيت وبيطلعوه
الزمن ماتقلبش حالو
وآلله العيب فينا
الزمن بلاش تظلموه
ربنا يرزقنا القناعه
كلمات علي عتريس ابو ادم تابع صفحتنا ليصلك كل ماهو جديد ومفيد من القصص والكلمات
ليست هناك تعليقات:
إرسال تعليق