{ يا بلدي }
لية المرار فيكي ....
يا بلدي ....طافح وكاسي
ولية عنك غريب
وأنتِي..... أقرب ناسي
ولية ملايين فيكي
مطحونة بتقاسي
ولية ولاد الأية..... فيكي
بتضحك وتلعب وتشوت وتباصي
وليه ليلهم مشعشع نهار وشماسي
ونهاري ليل أسود حالك وقاسي
وليه الملايين فيكِي ...
مش لاقية أصغر عش
وليةأصحاب الكراسي فيكِي
....في عز ويسر
وليه أخلاصي فيكي
..... دايما متهم
وفسادهم في عنيكي
....دايماً جميل ومحترم
ولية حق القوي فيكي؟
مضمون بالذوق وبالعافية
وحق الفقير يا ولداه مهضوم
عايز مليون محامي
وعمر تاني.... وميت خطه
جاوبيني قوليلي
ليه ميزان العدالة فيكي..
من دون البلاد ....بميت كفة
لما أنتي أم الدنيا مالك ؟
كارهاني ليه ....و كارهه إخلاصي
وعليا وحدي مال...حالك
واطربق..... علي راسي
جاوبيني قوليلي... كرهاني لية
أخترت من ولادك إتنين تلاته
.... وبعتي الباقي لية
كرهت نفسي ومش قادر أكرهك ...
معرفش لية أنا مفتون بيكي
مسكون بجنابك
يكون..عملالي عمل
وأنا داير في أركانك
ولا أنا درويش.... إتخبل
ودار سواح ...في رحابك
أبوس إيدي وإيدك
كل يوم... شكر وحمد
وما شوف منك ....
غير العناد والصد
مش حديد أنا
... خلي بالك يا بلد
خليني راقد تحت حملك
.....زي أجدع ولد
خليني غرقان في همك
.....لشوشتي ووداني
......شايلك بيد
والتانية بتعافر وبتعاني
والدمعة من قهرك
في عنية محبوسة وحرقاني
والشكوى منك ما تنفع
الشكوى منك تقلل
...من قدري ومن شاني
وخليني برا حسبتك خالص
خليكي مش عداني
وخليني جريمتك وذنبك
أنا قابل في حبك إتهامي
خليكي إنتي الجمال ...والبراءة
وخليني أنا الجاني
هيفضل مهما عملتي يا بلدي
حبك يجري في دمي
يرتاح في قلبي ووجداني
تسلمي...
...........
إسماعيل هريدي 2018/01/17.
ليست هناك تعليقات:
إرسال تعليق